အမှာစာ

Design Pattern နဲ့ ပတ်သက်ပြီး မြန်မာ Developer တွေ ကြားမှာ ကျယ်ကျယ်ပြန့်ပြန့်ပြောတာ မတွေ့သလို ရေးသားထားသည့် ဆောင်းပါးတွေလည်း နည်းပါးတာကို တွေ့ရပါတယ်။ MIU မှာ Design Pattern သင်ဖြစ်သည့် အခါမှာတော့ မြန်မာလို ပြန်ရေးမယ် လို့ စိတ်ကူးပြီး ပြန်ရေးခဲ့ပါတယ်။ အခုစာအုပ်ကတော့ ဒုတိယ အကြိမ် ပြန်ရေးထားသည့် စာအုပ်ပါ။ ပထမ အကြိမ်မှာ ရေးသားထားတာတွေ အကြမ်းဖြစ်ပြီး နားလည် ခက်သည့် အပိုင်းတွေ ပါနေတာ ကြောင့် နောက်တစ်ကြိမ် ပြန်ရေးသားထားပါတယ်။

ဒီစာအုပ် ကို မဖတ်ခင်မှာ UML class diagram ကို နားလည် ထားဖို့ လိုပါလိမ့်မယ်။ ဒီစာအုပ်မှာ UML Class Diagram တော်တော်များများ ပါဝင်ပါတယ်။ ဒါကြောင့် Design Pattern စာအုပ်ကို ဒုတိယ အကြိမ်ပြန်ရေးသည့် အခါမှာ အပိုင်း ၂ ပိုင်း ခွဲပြီး ရေးသားထားပါတယ်။ UML စာအုပ် နဲ့ Design Pattern စာအုပ် အပိုင်းပါ။ အစက ၂ အုပ် သီးသန့် ထားဖို့ ဖြစ်ပေမယ့် စာဖတ်သူ အဆင်ပြေအာင် တစ်အုပ်ထဲ ပေါင်းထားလိုက်ပါတယ်။

Design Pattern မဖတ်ခင်မှာ နောက်ထပ် နားလည်ဖို့ လိုတာကတော့ SOLID Principle ပါ။ SOLID ကို နားမလည်ရင် ဘာကြောင့် design pattern တွေ လုပ်နေရလဲ သဘောပေါက်မှာ မဟုတ်ပါဘူး။ SOLID principle နဲ့ ပတ်သက်ပြီး အသေးစိတ်ကို https://bit.ly/solid-saturngod မှာ တင်ထားပါတယ်။ ဒါကြောင့် SOLID Principle သိပြီးမှ စာအုပ်ကို ဖတ်ဖို့ တိုက်တွန်းလိုပါတယ်။